Langlundargeðið
sem Egill Helgason lagði út af í pistli sínum í Silfrinu í dag - sunnudag - er sannarlega umræðu vert. Hvers vegna sættum við okkur við hærri vexti - hærri verðbólgu - meiri óstöðugleika - hærra matvælaverð - dýrari skó og dýrari fatnað - en nokkrir aðrir?
Einhverra hluta vegna er verðlagning á landbúnaðarvörum dregin sérstaklega fram. Stórveldið á matvörumarkaðnum - Bónus/Baugur - hefur ákveðið að leggja virkilega til atlögu við töllmúra og innflutningsvernd íslenska landbúnaðarkerfisins. Skiljanlegt satt að segja að settar séu spurningar við innflutningsvernd gagnvart svínakjöti og kjúklingum. Iðnframleiðsla í nágrannalöndum er ekki ólík framleiðslu stórbúa á Íslandi og byggir á sama fóðri - en hins vegar hlýtur það að valda áhyggjum að framleiðsluumhverfi Evrópu er að flytjast til fjarlægari hluta álfunnar. Jafnframt er að færast í vöxt að uppruni fóðurs og framleiðslu fer til gömlu Sovétsvæðanna - og ennþá lengra til N-Afríku og Asíu - þar sem matvælaöryggi og umgjörð framleiðslunnar er ekki af þeim standard sem við viljum sætta okkur við. Danir og þjóðverjar hafa upplifað stórfellda fjölgun tilfella af smiti og hættulegri sýkingum - salmonella og kamfýlóbakter - síðustu missiri.
Getum við ekki orðið sammála um að við viljum fyrst og fremst setja strangar kröfur um hollustu og upprunavottun framleiðslu? Viljum við samþykkja innflutning á afgangsframleiðslu kjúklinga og svína - af undirboðsmörkuðum - frá SA-Evrópu?
Ég held ekki.
Landbúnaðarvörur skipta orðið frekar litlu í heildarrekstri heimilisins
og sífellt lægra hlutfall útgjalda fer í mjólk og kjöt. Það má hins vegar ekki verða til þess að við sættum okkur við sjálfdæmi framleiðenda í landbúnaði - t.d. með því að sameina í fyrirtæki allan mjólkuriðnaðinn í MS-risann - á sama tíma og innflutningur mjólkurvara er bönnuð og einokun MS er staðreynd.
Það er bensínið - fötin - vextirnir og skórnir sem eru dýrari á Íslandi
heldur en í Evrópu.
Það er verðtryggingin á pappírskrónunni og okur vextirnir sem eru fráleitu hlutirnir - og afhjúpa fáránleikann í myntkerfi dvergríkisins - sem hefur opnað fjármagnsflutninga - án fyrirvara.
Verðum að leysa þessa þversögn - og það eitt að ákveða í dag að leggja af fullum þunga í Evrópu-væðinguna mun hjálpa okkur að skapa stöðugleika á krónunni.....
meðan á aðlögunarferlinu stendur.
Afram Ingibjörg - og ekki láta gamla flokksarfinn frá Alþyðuflokknum og Alþýðubandalaginu rugla nýsköpunina.
NÝJA MIÐJAN OG TIL VINSTRI - ÞRIÐJA LEIÐIN - verðskuldar það. Þú hefur sprotann - og verður að beita honum. Þú ert í hlutverki álfkonunnar - og verður að nýta það - NÚNA.