Morgunkveðskapur

Minn ástsæli líflæknir Pétur Ingvi Pétursson hefur mikilvæga ábyrgð gagnvart velferð minni. Hann lætur sér líka annt um heilbrigði mitt andlegt og líkamlegt og veitir óumbeðinn ráð í margvíslegum siðferðilegum efnum. Ég sé mig knúinn til að upplýsa að ég leita ekki teljandi pólitískrar ráðgjafar hjá Pétri en fæ samt verulega leiðbeiningu með daglegum baðferðum og nokkuð reglubundnum söngæfingum með lækninum.

Þegar ljóst var hvernig úrslit lögðust í prófkjörinu síðastliðinn laugardag fékk ég heimsendan hjúkrunarfræðing (til áfallahjálpar – frá Pétri geri ég ráð fyrir) og fljótlega á eftir SMS með vísu þessarri;

Bullum var smalað úr byggð og fjöllum,

brattir menn gorta af klækjum sínum.

Sá flokkur er horfinn heillum öllum,

sem hafnar Benedikt vini mínum.

PP.04.11.2006

Sunnudagurinn leið nokkurn veginn aðgerðalaus – ég fékkst við að svara tölvupóstum og SMS-skilaboðum og dvaldi talsvert í símanum. Tíðindalítið fyrir það mesta enda ekkert útivistarveður.

Í morgunsundinu á mánudag (í morgun) var mér mætt með talsverðum dólgi af andmælendum mínum og nokkrum stríðnismönnum. Þannig lét “grafarinn” eins og nú væri komið að honum að annast um mín mál. Gunni Lór hafði ekki látið af sínum leiðindatóni og Óðinn eðalkratinn mórauði var úti á Hjalteyri og greinilega genginn þannig til liðs við þá í Fjallabyggð.

Pétur læknir sá hvað mér leið og flutti við “vatnsborðið” þessa harmabót;

Jafnan hann sút úr sinni rekur,

sjaldan er neitt sem beygir hann.

Ósigrum Benzi allvel tekur,

Því æfingin skapar meistarann.

PP.06.11.2006

Var þá deginum bjargað – fyrir mér og vonandi einhverjum fleirum. Ég er sem sagt orðinn fyrrverandi frambjóðandi – skammstafað fv.frambj.